Hámledarlıq dáwirindegi medicinalıq kórik
Hámledarlıq dáwirinde turaqlı tárizde shıpaker menen másláhátlesiw ózińizdiń hám bolajaq perzentińizdiń salamatlıǵın saqlawdaǵı eń áhmiyetli qádem bolıp esaplanadı. Hámledarlıq dáwiri jaqsı ótiwi, tuwıwdıń qáwipsiz hám náresteniń salamat bolıwı ushın óz waqtında shıpaker kóriginen ótiw júdá áhmiyetli.
Hámledarlıq dáwirindegi medicinalıq tekseriw bolajaq perzentińizdiń densawlıǵın baqlap barıw ushın áhmiyetli. Bul kórikler dawamında siz sorawlarıńızǵa juwap alıwıńız, qáweterleniwlerińizdi talqılawıńız hám salamat turmıs tárizi boyınsha usınıslar alıwıńız múmkin.
Hámledarlıq dáwirindegi medicinalıq kórik ne ushın áhmiyetli?
Hámledarlıq dáwirindegi medicinalıq kórik – bul hámledarlıq dawamında shańaraq shıpakeri yamasa akusher-ginekolog penen ushırasıwlar bolıp tabıladı.
Hámledarlıqtıń erte dáwirlerinen baslap medicinalıq kórikke turaqlı tárizde qatnaw ózińiz hám bolajaq perzentińizdiń salamatlıǵın úzliksiz túrde qadaǵalap barıwǵa járdem beredi.
Shańaraq shıpakeri yamasa akusher-ginekolog hámleniń rawajlanıwın baqlaydı, siz yamasa bala densawlıǵı menen baylanıslı mashqalalar yamasa qáwip-qáterler bolsa, olardı erte anıqlap, zárúr ilajlardı kóredi. Bul mashqalalar siziń fizikalıq yamasa ruwxıy salamatlıǵıńızǵa tiyisli bolıwı múmkin.
Kórik dawamında siz hámledarlıq, tuwıw, náreste tárbiyası hám basqa da sizdi qızıqtırǵan sorawlardı beriwińiz múmkin. Sonday-aq, shıpakerden salamat turmıs tárizi, durıs awqatlanıw, jetkilikli háreket hám tınısh uyqı hám jaqsı dem alıw boyınsha paydalı másláhátler alasız.
Hár bir kórikte siz shıpaker menen densawlıǵıńız hám hámledarlıq jaǵdayı haqqında áhmiyetli maǵlıwmatlardı talqılaysız. Shıpaker menen birgelikte qaysı analizlerdi tapsırıw, qaysı tekseriwlerden ótiw hám qay jerde tuwıwıńız boyınsha sheshim qabıllaysız. Ayırım tekseriwler anıq belgili háptelerde ótkeriliwi kerek boladı. Sol sebepli kórikten keshikpeń.
Eger siz hámledar bolıwıńız múmkin dep oylasańız yamasa hámledarlıǵıńızdı endi bilgen bolsańız, shańaraq shıpakerine xabarlasıń. Shıpaker sizge kerekli analizlerdi buyıradı, densawlıǵıńızdı tekseredi, akusher-ginekologqa jollama beredi hám tuwıw ushın medicinalıq mákemeni tańlawda járdem beredi.
Birinshi medicinalıq kórik ne ushın áhmiyetli?
Hámledarlıq anıqlanǵannan soń, shańaraq shıpakerine hámledarlıqtıń 12-háptesine shekem birinshi kórikten ótiń!
Bul siz hám tuwılajaq perzentińizdiń salamatlıǵı ushın eń áhmiyetli qádemlerdiń biri .
Birinshi kórikte shańaraq shıpakeri siziń ulıwma densawlıǵıńızdı bahalaydı, zárúrli analizler hám tekseriwlerdi ótkeredi. Eger zárúr bolsa, sizdi basqa qánigelerge de jollama berip jiberedi.
Shańaraq shıpakeri siziń mútájliklerińizge qaray keminde 8 márte medicinalıq kórikti óz ishine alǵan jeke baqlaw jobasın dúzedi. Bul qádem hámledarlıqtı salamat ótkeriw hám asqınıwlardıń aldın alıwda ayrıqsha áhmiyetke iye.
Hámledarlıq dawamında turaqlı baqlaw siz hám bolajaq perzentińizdiń densawlıǵınıń girewi bolıp esaplanadı. Shańaraq shıpakeri hámleniń rawajlanıwın basqıshpa-basqısh baqlap baradı. Eger sizde yamasa hámlede qáwip belgileri payda bolsa, olardı erte anıqlaw hám waqtında járdem kórsetiw múmkinshiligi artadı.
Hámledarlıqtaǵı ózgerisler tek ǵana deneńizde emes, al ruwxıy jaǵdayıńızda da júz beredi. Shańaraq shıpakeri bul táreplerdi de esapqa alıp, sizge kerekli másláhát hám usınıslardı beredi.
Esińizde bolsın: Birinshi kórik 12 háptege shekem - bul tek ǵana tekseriw emes. Bul siziń jańa turmısıńızǵa, ana bolıwǵa qoyǵan áhmiyetli qádemlerińizden biri. Birinshi kórikke barıwdı keshiktirmeń! Ózińizge hám bolajaq perzentińizge itibarlı bolıń!
Hámledarlıq dáwirinde medicinalıq kórikte neler boladı?
Siz neshe háptelik hámledar ekenińizge qarap, shańaraq shıpakeri yamasa akusher-ginekolog sizden tómendegiler haqqında sorawı yamasa tekseriw ótkeriwi múmkin:
hámledarlıq basqıshı hám bala tuwılatuǵın boljamlı sáneni anıqlaw
ulıwma salamatlıǵıńız hám medicinalıq tariyxıńız, sonıń ishinde aldınǵı hámledarlıq hám tuwıwlar
ruwxıy jaǵdayıńız, keypiyatıńız hám sizde qáweter yamasa depressiya bar-joqlıǵın anıqlaw ushın sorawlar
qabıllap atırǵan dárilerińiz: recept penen yamasa receptsiz beriletuǵın dáriler yamasa ósimliklerden tayarlanǵan dári-dármaqlar
jatır moynı rakı boyınsha skrining analizleri. Zárúrlik bolsa erte basqıshta bul analizge jiberiwi
qan basımı, sidik analizi, salmaqtı anıqlaw hám hámledarlıqta salamat salmaq arttırıw haqqında másláhátler
qarın ólshemińizdi ólshewi hám hámleniń júreginiń soǵıwın tıńlawı
júregińiz hám ókpeńizdi tıńlawı
qan analizleri, skrining tekseriwleri hám basqa analizlerdi usınıs etiwi hám olardıń nátiyjelerin túsindiriwi
hámledarlıq dáwirinde salamat awqatlanıw, sonday-aq qabıllaw múmkin emes bolǵan ónimler tuwralı másláhát beriwi
turmıs tárizin sorap, mısalı, shegiwdi taslaw yamasa spirtli ishimlik hám basqa da zatlardı qabıllawdı toqtatıwda járdem beriwi
jumıs ornıńız, jasaw shárayatıńız hám shańaraqtaǵı qollap-quwatlaw tuwralı sorap úyreniwi
tuwıw, kókirek súti menen awqatlandırıw hám náreste kútimi boyınsha hámledarlıq shınıǵıwlarına jazılıwdı usınıs etiwi
Hámledarlıǵıńız dawamında shańaraq shıpakeri yamasa akusher-ginekolog tómendegiler haqqında da sorawı, tekseriwi hám maǵlıwmat beriwi múmkin:
hámleniń háreketleri, ósiwi, jaylasıwı hám júrek urıwı
tuwıw belgileri, tuwıwǵa baylanıslı awırıwlar hám siziń tuwıw boyınsha tileklerińiz
mashqalalar yamasa asqınıwlar, mısalı, balanıń erte tuwılıw itimalı
náresteńizdi kókirek súti menen awqatlandırıwdıń áhmiyeti hám nátiyjesi.
Eger sizdi qızıqtırǵan másele haqqında shańaraq shıpakeri aytpasa, tartınbay sorań - bul pútkilley normal jaǵday.
Kórikler arasında sorawlar payda bolsa, olardı jazıp qoyıń, keyingi ret kórikte sorawıńızǵa ańsat boladı.
Eger sizde ata-ana bolıwǵa baylanıslı qáweterler yamasa shańaraqtaǵı qatnaslarda mashqalalar, sonıń ishinde zorlıq-zombılıq bolsa, bul haqqında da sóylesiw áhmiyetli.
Hámledarlıq dáwirinde neshe márte shıpaker kóriginebarıw kerek?
Eger densawlıǵıńız jaqsı bolsa hám hámledarlıq asqınıwsız ótip atırǵan bolsa, hámledarlıq dáwirinde keminde 8 márteshańaraq shıpakeri yamasa akusher-ginekolog tekseriwine barıwıńız usınıs etiledi. Bul kórikler úlken áhmiyetke iye bolıp, tómendegi múddetlerde ámelge asırıladı:
● 12 háptege shekem - birinshi áhmiyetli kórik, densawlıǵıńızdı bahalaw, analizler hám jeke joba dúziw;
● 18-20 háptelerde - hámleniń rawajlanıwın bahalaw hám skrining tekseriwleri (ultradawıslı tekseriw, tuwma kemshiliklerdi biykarlaw ushın);
● 26 háptede - hámledarlıqtıń qalay ótip atırǵanın, hámleniń jaǵdayın bahalaw, laboratoriyalıq analizler hám tiyisli másláhátler alıw;
● 30 hám 34 hápte tuwıwǵa jaqınlasqan, hámle hám ana organizminde áhmiyetli ózgerisler júz beretuǵın dáwir. Sol sebepli bul háptelerdegi kórikler hámleniń jaǵdayın bahalaw, qáwipsiz tuwıwǵa tayarlıq kóriw hám zárúr másláhátler alıw ushın júdá áhmiyetli.
● 36, 38 hám 40 hápteler ananıń da, náresteniń de densawlıǵı ushın eń juwapkershilikli hám dıqqat talap etetuǵın dáwirler bolıp esaplanadı. Mine usı háptelerde hámle tuwıwǵa tayarlanadı, sonlıqtan hár bir kórik júdá áhmiyetli esaplanadı.
Birinshi medicinalıq kórik júdá áhmiyetli. Dál usı ushırasıwda shıpaker siziń ulıwma densawlıǵıńızdı bahalap, zárúr analizlerdi belgileydi hám sizge pútkil hámledarlıq dawamında qaysı waqıtlarda medicinalıq kórikke keliwińiz kerekligin kórsetiwshi arnawlı joba dúzedi. Bul joba hámledarlıq dawamında ózgeriwi múmkin.
Bul joba siz neshe háptelik hámledar ekenińizge, densawlıǵıńızǵa hám aldınǵı hámledarlıq tájiriybeńizge qarap belgilenedi. Hámledarlıq dáwirinde jobada belgilengen kórik waqıtları ózgerip turıwı múmkin, óytkeni shıpaker siziń hám náresteniń jaǵdayına qarap kórikler sanın kóbeytiwi yamasa azaytıwı múmkin.
Sonlıqtan, hámledarlıq anıqlanǵannan soń, 12 hápteden aspay ilajı barınsha erte birinshi kórikke barıwıńız júdá áhmiyetli. Bul siziń hám bolajaq perzentińizdiń densawlıǵı ushın bekkem tiykar boladı.
Hámledarlıq dáwirinde medicinalıq kórikke jaqınadamıńız benen barıw
Eger múmkinshiligińiz bolsa, shıpaker kórigine ómirlik joldasıńız, jaqın adamıńız yamasa kewlińizge jaqın tuwısqanıńızbenen birge barıwdı usınıs etemiz.
Jaqın adamıńız sizge joldas bolsa, ol sizdi qollap-quwatlawı hám áhmiyetli maǵlıwmatlardı jaqsıraq esinde saqlawǵajárdem beriwi múmkin.
Ayırım jaǵdaylarda, shıpaker siz benen jeke sóylesiw ushın jaqın adamıńızdan qısqa waqıtqa sırtqa shıǵıp turıwın sorawı múmkin. Bul siziń jaǵdayıńızdı tartınbay talqılaw hám jeke pikirlerińizdi erkin bildiriwińiz ushın islenedi.
Itibar beriń, ayırım medicinalıq mákemelerde keshki waqıtlarda yamasa dem alıs kúnleri de kórik ótkeriledi. Bul siz hámsiziń joldasıńız ushın qolaylı bolıwı múmkin. Usınday múmkinshilikler tuwralı shańaraq shıpakerińizden aldın-ala sorapkóriń.
Eger kóriklerge jalǵız barsańız, bul hesh qanday mashqala tuwdırmaydı - bul pútkilley normal jaǵday.
Turaqlıtúrdeshıpakerkóriginenótipturıwıńız– eń áhmiyetlimásele!
Hámledarlıqta skrining tekseriwleri: oǵan qalaytayarlanıw kerek
Hár bir hámledar hayal keminde 8 antenatal kórikke qatnawı tiyis. Bul qatnawlar hámledarlıqtıń salamatótip atırǵanın qadaǵalaw, ana hám baladaǵı densawlıqqa baylanıslı mashqalalardı erte anıqlaw hámtiyisli ilajlardı ámelge asırıw ushın xızmet etedi.
Hár bir kórik áhmiyetke iye. Sonday-aq, 8 kóriktiń úshewi skrining tekseriwlerin óz ishine aladı. Skrining tekseriwi arqalı hámleniń qalay rawajlanıp atırǵanı hám onda násillik genetikalıq keselliklergebeyimlilikke, rawajlanıw nuqsanlarına tekseriledi.
Hámledarlıq dáwirindegi skrining tekseriwleri
Hámledarlıq dáwirinde skrining tekseriwleri tómendegilerdi óz ishine aladı:
● Ultradawıslı skrining tekseriwi (3 márte)
● Skrining qan analizi (birinshi trimestrde ótkeriw áhmiyetke iye)
Hámledarlıqta tómendegi dáwirlerde joba tiykarında skrining tekseriwleri ótkeriledi:
● Birinshi trimestr - 11-13 háptede
● Ekinshi trimestr - 18-20 háptede
● Úshinshi trimestr -28-32 háptede
Birinshi skrining tekseriwi ne ushın kerek?
Hámledarlıqtıń birinshi trimestrinde (11-hápteden 13-háptege shekem) ótkeriletuǵın skriningtiń tiykarǵı maqseti:
● Hámlede násillik keselliklerge beyimlilik bar yamasa joqlıǵın anıqlaw
● Hámledarlıq múddetin anıqlaw
● Egizekler bolsa olardıń sanın anıqlaw
● Qan basımı kóteriliw qáwpin bahalaw
● Hámleniń jatır ishinde durıs jaylasqanın anıqlaw
● Hámleniń júrek soǵıwın tekseriw
● Ananıń jatırı hám analıq bezleri jaǵdayın bahalaw
Shańaraq shıpakerińizdiń jollaması tiykarında siz skrining ultradawıslı tekseriwden hám skrining qan analizinen ótiwińiz múmkin. Birinshi skrining tekseriwin 11-hápteden 13-háptege shekemgi waqıt aralıǵında ótkeriw áhmiyetke iye.
Ayırım jaǵdaylarda ultradawıslı skrining tekseriwi yamasa skrining qan analizinde ózgerisler anıqlansa aymaqlıq Skrining orayında genetik shıpaker menen sóylesiw hám onnan másláhát alıw maqul boladı, ol sózsis sizdi qollap-quwatlap, járdem hám durıs baǵdar beredi.
Ekinshi hám úshinshi skrining ne ushın kerek?
Hámledarlıqtıń 18-háptesinen 20-háptesine shekem sizdi jáne bir áhmiyetli ultradawıslı skrining tekseriwi kútip tur. Bul tekseriw hámleniń salamat rawajlanıp atırǵanın hám mashqalalardıń joq ekenligin erte anıqlawǵa járdem beredi.
Bul tekseriwde balanıń bası, miyi, júregi, ókpesi, búyregi, kindigi, qol-ayaǵı hám basqa aǵzalarınıń jaǵdayı jaqsılap tekseriledi. Shıpaker balanıń júreginiń jaqsı hám bir qálipte soǵıp atırǵanın, qolları, ayaqları, barmaqları tolıq qálipleskenligin tekseredi.
Eger bala egiz bolsa, olardıń hár biri bólek kórip shıǵıladı. Sonday-aq, joldastıń jaylasıwı hám hámleniń jatırdaǵı jaǵdayı anıqlanadı.
Hámledarlıqtıń úshinshi trimestri 28-32 háptede sizdi ultradawıslı skrining hám hámlede qan aylanıwın bahalaw tekseriwi kútip tur. Bul tekseriw barısında kesh payda bolǵan rawajlanıw kemshiliklerin anıqlaw kózde tutılǵan.
Bul tekseriwler arqalı hámledegi awır mashqalalar, balanıń rawajlanıwına tosqınlıq etetuǵın jaǵdaylar óz waqtında anıqlanıwı, hámledarlıq boyınsha keyingi qadaǵalaw qanday bolıwı kerekligi jobalastırıladı.
Ózińizdi jaqsı sezip atırǵan bolsańız da, bul tekseriwlerdi qaldırmań.
Bul siziń hám balańızdıń densawlıǵı ushın júdá áhmiyetli basqısh!
Ekinshi hám úshinshi skrining tekseriwi ushın eń jaqsı múddet sáykes ráwishte 18-hápteden 20-hápte 6-kúnge shekem hám 28-hápteden 32-háptege shekem bolǵan dáwir.
Sonlıqtan bul dáwirde shańaraq shıpakeri yamasa ginekologıńızdıń qabıllawına barıp, jollama alıń.
Ultradawıslı tekseriwler hámle salamatlıǵı ushınqáwipsiz be?
Awa, ultradawıslı tekseriwler qáwipsiz, awırıwsız hám hámlege hesh zıyan keltirmeydi.
Házirgi zamanagóy ultradawıslı tekseriw apparatları júdá qáwipsiz, sebebi olar kúshli nurlanıw shıǵarmaydı, kerisinshe, ses tolqınları arqalı hámledarlıq dáwirinde kórinisti kóriwdiń eń maqul usılı esaplanadı. Bul balanıń densawlıǵı ushın hesh qanday zıyan keltirmeydi.
Hámledarlıq dáwirinde ultradawıslı tekseriwlerdiń qáwipsizligin esapqa ala otırıp, ol Ózbekstan Respublikası Densawlıqtı saqlaw ministrligi tárepinen belgilengen hámledarlıq dáwirindegi 8 tiykarǵı medicinalıq kórik qatarına kirgizilgen.
Bul tekseriwler arqalı siz perzentińizdiń keleshegi ushın juwapkershilikli birinshi qádemdi qoyasız!